قول للزمان ارجع يا زمان

29/05/2008

أخبار وتحليلات - قصاقيص صحفية - بحرى.كوم بقلم: منال غالب -  المصرى اليوم الست الزنانة أم لسان زالف.. قابلتني مرة تانية وأنا رايحة السوق.. ركبنا الميكروباص عشان يوصلنا أسرع، وبدأ السواق يلم الأجرة.. طبعاً التسعيرة زادت عشان البنزين غلّوه.. صاحبتنا.. فضلت تزن زي النحلة.. هاتك يارغي واعتراض وغيظ.. قالتلي.. ياختي التلاتين في الميه بتاعت المنحة لسه ماخدنهاش والكل عايز ينهش في لحمنا.. إيشي مواصلات وزيهم تموين، وإيشي لحمة وفراخ وخضار.. وكل ده يا شابة قبل ما يقبضها الأفندي بتاعي.. يعني قبل الهنا بسنة.. الكل اتفق علينا.. وسابونا لعبة للتجار المفترية.. قلتلها بطلي زن يازنانة.. هي الحكومة هاتجيبلك منين يعني علشان توازن أمورها؟ ماهي برضه معذورة العلاوة نسبتها كبيرة قوي.. قالتلي آه.. يعني من دقنه وافتله.. ماشي بس بيني وبينك دي فكرة ذكية إنهم يغلوا أهم حاجة.. ضربة معلم صحيح دول مش حطموا الأسعار دول ضربوها علقة سخنة تحت الحزام تعرفي أنا نفسي في إيه.. نفسي نرجع لأيام زمان.. الزمن الجميل.. نظام التبادل في الخزين.. أنا أديكي شوية سكر.. تديني كوباية زيت تموين.. أديكي كبشة قمح مستورد.. تديني طبق مخلل.. يعني من الآخر معاملات تجارية.. بس الخوف بقي آجي في مرة أقوم الصبح أدي جارتي عشر بيضات تديني عيل من عيالها أو تديني الأفندي بتاعها علشان شوية رز.. أهي دي بقي تبقي خيبة قوية.. قلتها شكلك يا حقنة مش هتروّحي بيتكم النهارده..  قالتلي وماله أهي فرصة نأكل لقمة حلوة ونقابل ناس أحلي وأحلي.. تعرفي قلبي حاسس كده إن بتوع القريه الذكية، عاوزين يتخلصوا مننا لو ممتناش من الفرسة. نموت بالأزمة القلبية.. علشان كده لازم يا حبيبتي وضروري بسرعة يثبتوا لنا حسن النية.. فتك بعافية. Comments Add New صاحب رأى  - ناس فاضية   |2008-05-29 16:32:20 الجكومة ده ناس فاضية يتنيلوا على خبيتهم ويجبولنا رغيف العيش الاول Reply 0   0 صاحب الأمل   |2008-05-31 18:14:08 حسبنا الله ونعما الوكيل فى الظالمين Reply 0   0 Write comment Name: Email:  do not notifynotify Title:   Powered by !JoomlaComment 3.26 3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

آخر تحديث ( 29/05/2008 )