جورج دبليو بوش قاتل المليون عراقي عاد للتحرش بالجمهورية الإسلامية الإيرانية بعدما ظبط أموره مع أتباعه في منطقة العربية، وهم "كثر على رأي الشاعر أبي فراس الحمداني...

اخبار عالمية - بحري.كوم

قراءت لك
جورج دبليو بوش قاتل المليون عراقي عاد للتحرش بالجمهورية الإسلامية الإيرانية بعدما ظبط أموره مع أتباعه في منطقة العربية، وهم "كثر على رأي الشاعر أبي فراس الحمداني... والمرة دي ما غلبش يلاقي سبب... فاكرين الفيلم اللي عمله قبل ما يضرب العراق؟ هو هو نفس الفيلم.... رمي بلا وتلقيح جتت بتفكرني بنسوان وش البركة، السبب يا سيدي اللي أعلنه القرصان بوش على لسان إدارته أن إيران بتسلح المليشيات التي تعمل في صفوف المقاومة! يعني "حرامي بيقول لصاحب البيت...بخ!".

كانت المرحومة أمي بتنيمنا ليلاتي ع الحواديت وكانت حواديتها مسحورة مشوقة آسرة لا يضاهيها في حلاوتها إلا سلطان النوم اللي كان بيخطفنا من حضن الأم وحواديتها الساحرة عشان يسلمنا للصباح الجددي وكأننا مخلوقين جديد- الله يرحمك يا أمه ويبشبش الطوبة اللي تحت راسك ويجعل مثواكي الجنة- وطبعاً كان فيه حواديت بتتعاد وتتكرر بناء على "ما يطلبه المستمعون" إلا حدوتة واحدة كانت هي اللي بتحب تعيدها على أسماعنا الصغيرة البريئة وهي حدوتة "الديب والحمل" لأن المناخ العام أيامها كان هو هو المناخ السائد في هذه الأيام إحنا- أنا وأخواتي وأمي- الدول الضعيفة المنهوبة ومخزنة الحقد والكراهية ومنتظرة "يوم تنفك فيه المظالم.. أبيض على كل مظلوم وأسود على كل ظالم" والمعسكر الآخر اللي هو أعمامي اللي نهبونا وبرضه مش سايبنا في حالنا، محاولات مستمرة لإذلالنا وتلقيح جتت وتحرش زي اللي بتعمله أمريكا في العالم في هذا الزمان البهلوان!.

والحدوتة بتقول بعد الصلاة ع النبي العدنان كان يا ما كان كان فيه حمل يتيم ساكن جنينة هادية وعايش على رعي عشبها اللي بيشرب من الجدول الصغير ويستظل بأشجار المانجة والجوافة والمشمش اللي واقفة في الجنينة صفوف ويوم من ذات الأيام طلع الحمل يشرب من الجدول شاف الديب واقف بيشرب قال في عقل باله "اللهم احفظنا" وابتعد عن مكان الديب وأثناء ما هو واقف يشرب قرب منه الديب، وقال له ما معناه:

- مش تخلي عندك دم وتميز يا حيوان.
قال له بمنتهى الخوف:
- خير ياعم اللهم اجعله خير
رد الديب بعجرفة:
- والخير حيجي منين طول ما الدنيا فيها أمثالك الرعاع
قال له الحمل الوديع:
- البركة في أمثال حشرتك من السادة اللي ماليين الدنيا خير.
قال له:
- ما تلوعش الكلام واوعى تفتكر أن السهتنة بتاعتك دي حتخيل علي وتنسيني أصل الموضوع.
قال له:
- والله يا أستاذ أنا ما قصدت سهتنة ولا حاجة، لني ما أعرفش أصل الموضوع اللي سعادتك بتتكلم عنه.
قال له:
- أيوة يا واد خش في عبي خش، الموضوع يا روح خالتك إنك ما انتظرتش لما أشرب وروحت هاجم ع المية عشان تتسمم قمت عكرت علي المية وشربت أنا العكار... كويس كدة؟
- يبدو يا أفندم أن فيه لبس في الأمر
قال بغيظ
- لبس إيه وقلع إيه
قال له:
- المية يا افندم جاية من ناحية سعادتك على عندي يعني ما ينفعش العكار يجيلك دة إذا كان في عكار صحيح.
قال له:
- يعني إيه! بتكدبني يا معفن! ثم إنت مش شتمتني.
قال له:
- يتقطع لساني يا أفندم، أنا اشتم جنابك!
قال له:
- أيوة شتمتني السنة اللي فاتت بالأمارة
حاول الحمل أن يتظاهر بالضحك وهو في غاية الرعب
- مش باقولك يا أفندم فيه لبس في الموضوع! أنا يا أفندم لسة مولود السنة دي
قال له:
- يبقى أبوك هو اللي شتمني
قال له:
- أنا أبويا ميت يا لإادنم... يعني أن يتيم.
قال له:
- يبقى واحد من قاريبك هو اللي شتمني ... يعني واكلك واكلك
قال له:
هو دة منطق القوة الغاشمة اللي بيستعمله بوش البلطجي قاتل الأطفال ويشيع من خلاله الموت والدمار في العالم. ولسة الأمريكان بيتساؤلوا بمنتهى البراءة (العالم بيكره أمريكا ليه؟).